【快閃台北三日兩夜2018】台灣3日2夜食、玩行程懶人包

想搵酒店?用Agoda訂酒店,優惠高達80%! 全球超過750,000家酒店任您選擇: Agoda 日本 台灣 泰國 韓國

台北一直都係香港人熱愛嘅旅遊勝地,撞啱有平機票嘅話,機票連住宿更加可能連一千蚊都唔洗!如果Plan得好啲,隨時可以禮拜五放工後出發,禮拜日晚夜機返嚟,真係連請假都慳番啊!想嚟個快閃台北3日2夜?小編已經為你一一計劃好行程同酒店,仲話埋比你知邊度打卡最吸Like,即刻一齊用盡3日2夜玩轉台北啦!

台北自由行|快閃台北三日兩夜2018|第一日:寧夏夜市

香港飛台北兩個鐘都唔洗,禮拜五晚放工即刻出發嘅話,落咗機隨時仲趕得切去食翻個靚宵夜𠻹!翻酒店擺低行李之後,就梗係去附近嘅夜市掃街搵好西食醫肚啦!小編強烈推介你去位於大同區嘅寧夏夜市尋覓美食,佢喺2015年台北市政府舉辦嘅「台北夜市之最」投票選舉之中奪得「最好逛夜市」、「最美味夜市」、「最有魅力夜市」、「最環保夜市」以及「最友善夜市」冠軍,絕對係台灣夜市嘅不二之選!

寧夏夜市深受台北市民嘅歡心並唔係冇原因嘅,因為豬肝榮仔、劉芋仔蛋黃芋餅同埋圓環邊蚵仔煎等小食攤檔都入選咗2018「米芝蓮必比登推薦」同埋「米芝蓮餐盤」,絕對係非一般嘅小食攤檔,好多台北人同遊客都蜂擁去到夜市搵食,難怪寧夏夜市咁受歡迎啦!

寧夏夜市
地址:台北市大同區寧夏路(顯示地圖
開放時間:17:30 – 00:00
交通:捷運雙連站步行約8分鐘

台北自由行|快閃台北三日兩夜2018 |第二日:金花碳烤吐司專賣 

一早起身就梗係即刻去金花碳烤吐司專賣食返件爆漿芝士吐司醒醒神啦!呢度嘅吐司麵包全部都係自家製作,好有heart㗎!而且老闆仲會放超級多份量嘅芝士落去,咬落啖啖都有拉絲嘅效果,真係極度邪惡啊!

如果你唔鍾意食芝士嘅話,金花碳烤吐司專賣亦有其他唔同口味可以試下,想要食鹹定食甜都得,而且全部都非常足料,啲名仲好得意㖭,好食得嚟又有創意,正啊!

金花碳烤吐司專賣
地址:台北萬華區內江街17號(顯示地圖
電話:+886 905 663 001
營業時間:08:30 – 15:00
交通:捷運西門站步行約5分鐘
Facebookhttps://www.facebook.com/pg/goldenflowertoast/

台北自由行|快閃台北三日兩夜2018|第二日:華山1914文化創意產業園區

食完個咁滿足嘅早餐之後,我哋就轉戰華山1914文化創意產業園區!不過點解要嚟呢度呢?因為無論你係真文青定偽文青都好,相信你都一定會鍾意呢度嘅氛圍。華山1914文化創意產業園區定期會舉辦唔同嘅展覽,例如之前嘅「顛倒屋」同埋「Sailor Moon展覽」都曾經喺呢度舉辦,咁多唔同種類嘅展覽,總有一個啱你心水,同時又可以吸收更多文化氣息,真係一舉兩得!

華山1914文化創意產業園區
地址:台北市中正區八德路一段1號(顯示地圖
電話:+886 2 2358 1914
交通:捷運忠孝新生站步行約6分鐘
網址:https://www.huashan1914.com/w/huashan1914/index

台北自由行|快閃台北三日兩夜2018|第二日:Power Beef烤牛肉專門店 

華山1914文化創意產業園區行到咁上下,肚仔都應該開始有啲餓㗎喇,咁就係時候要搵嘢食喇!小編為你精選咗附近嘅人氣美食 — Power Beef烤牛肉專門店。呢間小酒館主打牛肉丼同埋紅酒,佢哋嘅招牌「烤牛肉丼」份量十足,堆砌成火山一樣咁高,睇見都令人口水直流!而佢哋最特別嘅地方在於牛肉丼嘅醬汁,自家特製烤肉醬汁喺出面食唔到,再加埋酸奶醬,兩者嘅味道真係超夾,如果你係食肉獸就一定會愛上!

Power Beef 烤牛肉專門店
地址:台北金山南路一段50號(顯示地圖
電話:+886 2 2395 2583
營業時間:11:30 – 14:30 / 17:30 – 22:00
交通:捷運忠孝新生站步行約6分鐘
Facebookhttps://www.facebook.com/powerbeeftw/

台北自由行|快閃台北三日兩夜2018|第二日:Va Va Voom

近期台北大熱嘅打卡熱點一定要數到 Va Va Voom,佢哋最出名嘅就係室內華麗嘅裝潢同埋一大片嘅花牆,淨係影相都有排影啊!小編推薦大家一定要試埋佢哋嘅 Cocktail,杯杯都靚到唔捨得飲!肚餓嘅朋友亦都可以試埋佢哋嘅食物,好多菜式都用上鮮花入饌,每一款賣相都好特別㗎!

Va Va Voom
地址:台北市光復南路346巷21號(顯示地圖
電話:+886 2 2773 6006
營業時間:12:00 – 21:30
交通:捷運國父紀念館站步行約4分鐘
網址:https://www.vavavoom.cc/

台北自由行|快閃台北三日兩夜2018|第三日:陳根找茶 

蛋餅係台灣最具代表性嘅早餐選擇,所以離開台灣之前嘅早餐就當然要食蛋餅啦!小編介紹你去呢間被譽為「台北蛋餅之王」嘅陳根找茶,嘆返個正宗台式蛋餅,再飲埋老闆親手製作嘅愛心豆漿,開始一個 Good Morning!

陳根找茶
地址:台北市信義區莊敬路391巷7號(顯示地圖
營業時間:06:00 – 12:30
交通:捷運世貿/台北101站步行約8分鐘
Facebookhttps://www.facebook.com/ChenGenZhaoCha/

台北自由行|快閃台北三日兩夜2018|第三日:七十二牛肉麵

嚟到台灣無理由唔食返碗牛肉麵先走!評鑑為四星高評價嘅七十二牛肉麵,佢哋嘅湯頭由大量牛骨熬製而成,香濃乳白色嘅湯底可以話係七十二牛肉麵嘅精髓啊!對比起紅燒牛肉麵,小編更推介佢哋嘅清燉牛肉麵,因為可以直接品嚐到湯底嘅濃郁滋味!

七十二牛肉麵
地址:台北市中正區濟南路二段71號(顯示地圖
營業時間:11:00 – 14:30 / 17:00 – 21:00
交通:捷運忠孝新生站,步行約2分鐘
Facebook:https://www.facebook.com/七十二牛肉麵-212017308855472/

更多相關旅遊資料...

About The Author

旅遊邦 Traveltopia

Traveltopia (旅遊邦)是一個旅遊群組,主要是想要推廣自助旅行(又稱自由行),希望可以幫助大家感受到旅遊樂趣。我們是一群熱愛生活的人,喜歡用自己的模式,到不同的國家、不同的城市,將旅遊的故事分享出來。在旅程中,沒有人能當你的指南針,只有你才能引領漂泊在大海中的自己,找出屬於自己生活。如有合作,可以inbox我們或電郵至[email protected]

Leave a Reply

Your email address will not be published.